«Жас Дарын» бастауыш мектебі 2019 жылдың 1 сәуір күні ашылған.
Мектеп – болашақ негізін қалыптастыратын, ел мерейін асқақтататын, тұлғалар баптайтын құтты мекен, алтын ұя. «Жас Дарын» бастауыш мектебі шәкірттеріне үлкен тәрбие, білім беретін киелі орда.
Мектебіміз – барлығымыздың мақтанышымыз. Сегіз-ақ әріптен құралған бұл сөздің құдіреттілігі де сонда жатқан болар. Жас ұрпақты сәулетті қоғамымыздың жан-жақты жетілген, жарасымды азаматы етіп қалыптастыру – мектеп ұжымының мақсаты, шын жүректі тілегі.
Мектепті алғаш ашылған күнінен бастап білгір де білікті басшы «Ы.Алтынсарин», «Тәуелсіздік» медалінің иегері Бердимбетова Айман Сеитовна басқарып келді.
Мектептің атақ-даңқын шығаратын — мектеп басшысы, яғни, директор. Директор — мектептің миы, ұжымның ақылшысы, туындаған проблеманы дер кезінде шеше алатын, шештіре алатын, ұжымды ұйымдастыра алатын ұйымдастырушы. Білімі ұшан-теңіз, мәдениеті жағынан қарамағындағылардан биік тұратын, қызметкерлердің іскерлігін айыра білетін, дер кезінде көмек бере алатын, тіпті мектеп оқушыларының қабілетін, мінез-құлқын, олардың ата-анасын, тұрмысын жетік білуге талпынған директор ғана мектептің бақыты.
Өзінің көзі жетпей, біреудің қаңқу сөзіне ермейтін. Жоғары жақ айтты екен деп, басын шұлғи бермейтін. Жоғары жаққа сөзі де, беделі де жүретін, идеясы көп, оқытушы, тәрбиеші, оқушы пікіріне де ден қоятын, дауыс көтермей көзқарасымен ұқтыратын, жүрісі әсем, жүзінен нұры шашылып тұратын, бойында тұнып тұрған іскер басшы болды. Мұғалімдердің саяси білімді, мәдениетті болуын талап ететін. Ол кездері мұғалімдер арасында саяси сабақтар жүргізілетін, оған қатысып отыратын. Сөйлеуші мұғалімдердің білім дәрежесін анықтап: «Қарағым көп оқып, тоқу керек» деп отыратын. Мектеп ұжымы жұмысының қыр-сырын сипаттап көрсете беретін. Біздің мектепте бір неше директорлар қызмет атқарды. Бір-екі-үш директордың істерін сөзге тиек етсек, артық болмас.
Беделов Пернебай Балабекович – Сабақтан тыс кезде кабинетіне шақырып, әнші-күйші оқушыларға ән айтқызып, күй тартқызып, рахаттанып, мақтанып отыратын. Бұл мектепке қабылданатын мұғалімдер де, оқушылар да «Абай жолы» романындағы басты кейіпкерлерді білуі тиіс дейтін. Кейде бір үзінді туралы әңгімелеп беруді талап ететін. Кейбір оқушы кітапты қолтығына қысып жүрсе де, шала оқиды деп, сұрақтар беріп қысып жататын. Анау-мынауды сылтауратып, қызметке келіп, кетіп қалатындарды тәртіпке келтірді.
Сеит Бекасыл Төреханұлы — Директорлар ішіндегі ең жасы. Мектептің шаруашылық, қаржылық ісінде соған байланысты заңдарды жетік білді. Қиын кезеңдерде мектепті жүдетпей ұстады, эстетикалық талғамы да, саяси білімі де жоғары, оқу үдерісіндегі жаңалықты да, оқу әдістемесін де жетік білді. Мұғалімдердің сабақтарына ұдайы кіріп, талдап, сабақтың тиімділігін арттырудың әдіс-тәсілдеріне және оқушылардың өз беттерімен ойлану қабілеттерін жетілдіруге, шығармашылықпен айналысуға, олардың бойында зерттеушілік қабілетін дамытуға мән беретін.
Мектептің білімін арттыратын директордың іскерлігі ғана емес, оның оң қолы оқу-тәрбие, ғылыми жұмыстар жөніндегі орынбасарлары. Сол қолы – шаруашылық жөніндегі орынбасары. Оң қолы мен сол қолы ортақ болса, директор мықты. Біраз директорлар тірек болатын орынбасарларын дұрыс таңдап ала алмай жүр. Сондықтан оқу-тәрбие жұмысында ақау көп.
Сонымен мектептің басы, миы директорлар болса, оның жүрегі – оқу, тәрбие, ғылыми істері жөніндегі орынбасарлары. Олар директордың басшылығымен мектептің бір жылдық оқу жоспарын жазып, талқыға салып, істелінетін іс-шаралардың басында болып, бақылап, қорытындысын шығарып, сабақ кестесін жасау, мұғалімдердің сабақ беруін, сабаққа жаңа технологияны енгізуін, жетістігін, кемшілігін, оқушымен қарым-қатынас, мұғалімнің жүрісі, киім-киісі, дауыс ырғағы, әдептілігі, оқушылардың сабаққа қатысуы, ынтасы, тұрмыс жағдайы, білім сапасы, түрлі үйірмелерге, пән олимпиадасына, ғылыми жоба жарыстарына оқушыларды іріктеп алу, ата-анамен жұмыс, тізе берсең, ұшы-қиыры жоқ, ерте келіп, кеш кететін, қысқасы, сондай азаматтар біздің мектепте де болды, қазір де бар.
Мектептің ұстаздары қала, республика көлеміне танымал мұғалімдеріміз бар.
Болашақта «Жас-Дарын» бастауыш мектебі озық мектептердің қатарынан болады деген сенімдеміз!
Бұл мақтауға да, мақтануға да тұрарлық білім ордасы!